మానవ అభివృద్ధి అంశమే…. ప్రకృతి విధ్వంసం

పర్యావరణ పరిరక్షణ ప్రతి ఒక్కరి బాధ్యత

పర్యావరణాన్ని రక్షించడం ప్రతి ఒక్కరి బాధ్యతగా భావించాలి. ఇది ఎప్పటికైనా పాటించాల్సిన ముఖ్యమైన అంశం. అయితే, మన ఎదుగుదల కోసం ప్రకృతిని ధ్వంసం చేస్తూ, మనుగడకు ముప్పు కలిగించే పరిస్థితులు సృష్టించుకుంటున్నాం. మానవ జీవనానికి అవసరమైన అటవీ సంపదను కాపాడాల్సిన బాధ్యత మనందరిది. పర్యావరణ శాస్త్రవేత్తల అభిప్రాయ ప్రకారం, వృక్షాలు మనిషి అవసరాలకు, ఆశల కోసం ఎంతో కొంత త్యాగం చేస్తూ ఎండమావులుగా మారుతున్నాయి.

అడవుల కోత వల్ల పెరుగుతున్న కాలుష్యం

వృక్ష సంపద తగ్గిపోవడం, అడవుల క్షీణతతో పాటు, వందలాది వృక్షాలు, అటవీ జంతువులు కనుమరుగవడం పర్యావరణ కాలుష్యానికి దారితీస్తోంది. అభివృద్ధి పేరిట మన జీవనాన్ని స్వచ్ఛందంగా నాశనం చేసుకుంటున్నామనే విమర్శలు వెల్లువెత్తుతున్నాయి.

ప్రకృతి మీద మనిషి తీరుపై విమర్శలు

మనిషి ప్రకృతిపై వ్యతిరేకంగా వ్యవహరిస్తూ, చెట్లను నరికి, నదులను కలుషితం చేస్తున్నాడు. ఈరోజు ప్రకృతి సమస్య ప్రపంచ వ్యాప్తంగా ప్రధాన సమస్యగా మారింది. మన కళ్లముందే అడవులు అదృశ్యమవుతున్నాయి. ఈ విషపూరిత వాతావరణం నుంచి బయటపడాలంటే, నరికిన చెట్ల స్థానంలో కొత్త చెట్లను నాటడం అవసరం.

అడవుల రక్షణ అవసరం

భూమిపై 33% అడవులు ఉండాలని అటవీ విధానం చెబుతున్నా, ప్రస్తుత పరిస్థితిలో అటవీ ప్రాంతాలు 20%కే పరిమితమయ్యాయి. పోడు వ్యవసాయం, ఆక్వా సాగు పేరుతో మడ అడవులు, చెట్లు నాశనం అవుతున్నాయి. మనిషి అభివృద్ధి ప్రకృతిపై ఆధారపడి ఉండాల్సి ఉంటే, అది సమతుల్యంగా ఉండాలి. లేకపోతే, భవిష్యత్తులో సమస్యలు తప్ప సుఖమైన జీవితం అందుబాటులో ఉండదు.

పార్లమెంటు చర్చలో అడవుల అంశం

ఇటీవల పార్లమెంటులో అడవుల పై చర్చ జరిగింది. కేంద్ర ఫారెస్ట్ మంత్రి భూపేంద్ర యాదవ్ ప్రకారం, అభివృద్ధి ప్రాజెక్టుల పేరుతో 33 లక్షలకు పైగా చెట్లను నరికివేసినట్లు వెల్లడించారు. దీనిపై ప్రజానీకం ఆలోచన చేయాల్సిన సమయం ఆసన్నమైంది.

పర్యావరణ ధ్వంసం దుష్పరిణామాలు

అడవుల క్షీణత కారణంగా భూతాపం ప్రమాదకర స్థాయికి చేరుకుంది. వాతావరణ మార్పుల వల్ల వరదలు, అకారణ వర్షాలతో అనేక ప్రాంతాలు నష్టపోతున్నాయి. ప్రకృతి మనిషి తొలి ఆస్తి అని గుర్తించి, విలువైన వనరులను భవిష్యత్తు తరాలకు అందించాల్సిన బాధ్యత మనది.

పరిశ్రమల కాలుష్యం ప్రభావం

పరిశ్రమల నుంచి వస్తున్న వ్యర్థాలు, రసాయనాలు, కలుషిత వాయువుల వల్ల వాతావరణం తీవ్ర కాలుష్యానికి గురవుతోంది. ఇలాంటి పరిస్థితుల్లో, ప్రకృతి పరిరక్షణకు కట్టుబడడం తప్పనిసరి.

భారత్‌ కాలుష్య భాదిత నగరాల్లో ఏడవ స్థానంలో

వరల్డ్‌లోని మొదటి పది కాలుష్య నగరాల్లో భారత్ ఏడవ స్థానంలో ఉందన్న సమాచారం ఆందోళన కలిగిస్తోంది. ప్రకృతి పట్ల మన ఆలోచనా విధానాన్ని మార్చుకోవాలి. అభివృద్ధి, ప్రకృతి పరిరక్షణ మధ్య సమతుల్యత సాధించాల్సిన అవసరం ఉంది.

ప్రకృతి ధ్వంసానికి ఉదాహరణలు

మొన్నటి ఉత్తరాఖండ్, కేరళ ప్రళయాలు, తమిళనాడు వరదలు, అలాగే రెండు తెలుగు రాష్ట్రాల్లో జరిగిన భారీ వర్షాలు, వరదలు ప్రకృతి విధ్వంసానికి నిలువెత్తు ఉదాహరణలుగా నిలుస్తున్నాయి. వీటివల్ల ప్రాణ, ఆస్తి నష్టాలు తీవ్రమయ్యాయి.

ప్రకృతి పరిరక్షణే మన భవిష్యత్తు ఆరోగ్యం. అందుకే పర్యావరణాన్ని కాపాడేందుకు అందరం కట్టుబడి ఉండాలి.

—పట్ట. హరి ప్రసాద్